Tedros Adhanom Ghebreyesus, framkvæmdastjóri Alþjóðaheilbrigðisstofnunarinnar, kveðst skilja ástæður þess að nokkur ríki hafa gripið til þess að krefjast neikvæðra COVID-19 sýna frá kínversku ferðafólki.

Tedros segir Kínverja þurfa að láta stofnuninni í té ítarlegar upplýsingar um stöðu mála í landinu en faraldurinn geisar þar af miklum krafti eftir að ströngum sóttvarnartakmörkunum var aflétt.

Tedros hefur nokkrum sinnum áður lýst áhyggjum af útbreiðslu faraldursins í Kína og upplýsingaskorti þarlendra yfirvalda.