Hafa þarf hraðann á við gerð nýs öryggis- og varnarsamnings milli Ástralíu og Papúa Nýju Gíneu.

Þetta er mat Anthony Albanese, forsætisráðherra Ástralíu, en ríkisstjórn hans hyggst beita öllum leiðum til að bregðast við auknum umsvifum Kínverja á Kyrrahafi. Forsætisráðherrann ávarpaði þing Papúa Nýju Gíneu í morgun þar sem hann lagði áherslu á mikilvægi samstöðu ríkja á svæðinu.

Albanese sagði samninginn, sem enn er í smíðum, verða að byggjast á trausti og líkti ríkjunum við fjölskyldu sem yrði að standa saman. Papúa hlaut sjálfstæði frá Ástralíu árið 1975 en Ástralir leggja þessum nágrönnum sínum til víðtæka efnahags-, varnar- og löggæslaðstoð.

Vestrænum leiðtogum var nokkuð brugðið eftir að drögum að varnarsamningi Kína og Salómónseyja var lekið í apríl á síðasta ári en leiðtogar annarra ríkja höfnuðu mánuði síðar víðtækara samkomulagi.