Bandarísk flugmálayfirvöld segja engin merki þess að tölvuárás hafi verið gerð á NOTAM aðvörunarkerfi til flugmanna en tímabundin bilun á því varð til þess að fresta þurfti fjöldanum öllum af innanlandsflugferðum í gær.

Kerfinu er ætlað að tilkynna flugmönnum um allar breytingar og hættur sem geta haft áhrif á öryggi í flugferðum. Frumrannsókn bendir til bilunar í gagnagrunni kerfisins en þótt tekist hafi að komast fyrir vandann leiddi stöðvunin af sér miklar tafir sem varla sér enn fyrir endann á.