21. apríl 2023 kl. 6:40
Erlendar fréttir

„Landsvæði beggja vegna Taívan-sunds tilheyra Kína“

„Landsvæðin beggja vegna Taívan-sunds tilheyra Alþýðulýðveldinu Kína,“ segir Qin Gang, utanríkisráðherra Kína og því sé það í fullum rétti til að tryggja fullveldi sitt þar um slóðir.

Qin Gang, utanríkisráðherra Kína, talar á sameiginlegum blaðamannafundi hans og utanríkisráðherra Þýskalands í Beijing, höfuðborg Kína,  14. apríl 2023.
EPA-EFE/SUO TAKEKUMA

Ráðherrann lét þessi orð falla á ráðstefnu í stórborginni Shanghai þar sem hann fór um víðan völl, allt frá því að ræða skuldsetningu fátækra ríkja til efnahagsástands heimsins og stöðunnar í Úkraínu að ógleymdu Taívan.

Qin sagði ásakanir á hendur Kínverja þess efnis að þeir ógnuðu stöðugleika í heimshlutanum fáránlegar og afleiðingar þeirra hættulegar.

Ríkisstjórn þjóðernissinna flúði til Taívan og endurreisti þar lýðveldið Kína eftir sigur kommúnista í borgarstyrjöldinni 1949 en stjórnvöld alþýðulýðveldisins líta á eyjarnar sem óaðskiljanlegan hluta þess. Aðeins rúmur tugur ríkja viðurkennir nú fullveldi Taívan.