Antony Blinken, utanríkisráðherra Bandaríkjanna, heitir stuðningi við friðarferli milli Asera og Armena.

Hann ræddi um helgina við leiðtoga ríkjanna beggja og hvatti til að opnað skyldi fyrir umferð borgaralegra farartækja um landleiðina milli Nagorno-Karabakh og Armeníu. Ríkin tvö hafa áratugum saman deilt um yfirráð héraðsins og háð tvö mannskæð stríð vegna þess.

Blinken tjáði Ilham Aliyev, forseta Aserbaísjan, þungar áhyggjur sínar af nýuppsettri eftirlitsstöð Asera á Lachin-hliðinu, fjallvegi sem tengir Armeníu og Nagorno-Karabakh. Armenar sögðu það brot á vopnahléssamkomulagi sem komst á með fulltingi Rússa árið 2020.