Skothvellir hafa kveðið við í nótt nærri herflugvelli í miðhluta Ouagadougou höfuðborgar Vestur-Afríkuríkisins Búrkína Fasó.
AP
Tíu mánuðir eru liðnir frá því að herforingjar undir stjórn höfuðsmannsins Ibrahims Traore steyptu Paul-Henri Sandaogo Damiba ofursta af stóli eftir innan við níu mánaða valdatíð. Damiba rændi völdum af Roch Marc Christian Kabore, kjörnum forseta Búrkína Fasó.
Ástandið í landinu og á Sahel-beltinu öllu hefur undanfarin ár verið litað af baráttu við vígasveitir öfga-íslamista. Ástæða beggja valdaránanna var vangeta stjórnvalda að bregðast við atlögum þeirra. Þúsundir hafa fallið í árásum vígamanna undanfarin ár, fimm þúsund það sem af er þessu ári, og næstum tvær milljónir manna hafa neyðst til að yfirgefa heimili sín.
