Búast má við áframhaldandi truflunum á umferð um Heathrow flugvöll á Bretlandi í dag, þriðjudag. Hann er fjölfarnasti flugvöllurinn á Bretlandseyjum. Búist er við að allt verði með eðlilegum hætti á Gatwick, þeim næst stærsta, samkvæmt frétt á Sky.

Mikil röskun varð á flugi til og frá landinu í gær vegna tæknibilunar hjá Bresku flugumferðarstofnuninni. Það olli meðal annars töfum fyrir íslenska flugfarþega. Í gærkvöld var tilkynnt að vandinn væri leystur, en að einhverja tafa yrði þó vart áfram. Flugfarþegar eru hvattir til að leita upplýsinga hjá því flugfélagi sem þeir ferðast með.