Á meðan augu flestra Hollendinga og annarra Evrópubúa voru á hollensku kosningunum var ekki síðri spenna í hollensku borginni Tilburg vegna horfinnar eiturslöngu. Borgarbúar hafa verið á nálum síðan á mánudag eftir að eigandi slöngunnar tilkynnti lögreglunni um hvarfið.

Lögreglan sendi frá sér tilkynningu um að stórhættuleg tveggja metra löng eiturslanga væri horfin úr búri sínu, og íbúar beðnir um að halda sig innandyra. Ef hún yrði á vegi þeirra ættu íbúar alls ekki að reyna að fanga hana.

Leitarhundar og slöngusérfræðingar voru fengnir til aðstoðar við leitina, þar til það kom í ljós í dag að hún hafði náð að koma sér innan í millivegg á heimili eigandans. Slangan var í fínu ásigkomulagi þegar hún fannst og tókst að innbyrða vatn.