Dave Calhoun, forstjóri bandaríska flugvélaframleiðandans Boeing, heitir fullkomnu gagnsæi við rannsókn á ástæðum þess að gat myndaðist á skrokki Boeing 737 Max 9 þotu Alaska Airlines skömmu eftir flugtak á föstudag.

Calhoun sagði, á neyðarfundi með með starfsfólki, atvikið mega rekja til mistaka fyrirtækisins. Forstjórinn kvaðst bera fullt traust til niðurstaðna öryggisnefndar samgöngumála, sem nú rannsakar málið.

Hleri sem lokar ónýttum neyðarútgangi losnaði þannig að stórt gat kom á skrokk MAX þotunnar og öryggisnefndin telur honum ekki hafa verið rétt fyrir komið. Bandaríska flugmálastofnunin kyrrsetti 171 vél þar sem málum er eins háttað og vinnur að undirbúningi sérstakrar rannsóknar á þeim í samvinnu við Boeing.