Joe Biden Bandaríkjaforseti hefur dregið í land yfirlýsingar um að vopnahlé náist milli Hamas-samtakanna og ísraelskra stjórnvalda fyrir mánudag.

Biden var spurður af fréttamanni fyrir utan Hvíta húsið hvort hann væri enn vongóður um að vopnahlé náist. „Vonin sigrar allt. Ég var á símafundi með fólki á svæðinu, líklegast ekki fyrir mánudag en ég er vongóður.“

Fulltrúar Hamas sögðu bjartsýni Biden ekki endurspegla raunveruleikann og að bilið milli samtakanna og ísraelskra stjórnvalda sé enn mikið.

Benjamin Netanyahu, forsætisráðherra Ísraels, sagði á fimmtudag að hann ætlaði ekki að láta undan alþjóðlegum þrýstingi um að binda endi á stríðið fyrr en stjórnvöld hafi náð öllum sínum markmiðum.