Joe Biden Bandaríkjaforseti sagði að stríði Ísraela á Gaza yrði að ljúka nú þegar og bætti við að hann hefði tekið aftur upp tilraunir til að koma á vopnahléi. Þetta sagði hann við blaðamenn á kjörstað í Wilmington í Delaware í dag.

Biden kaus utan kjörfundar fyrir forsetakosningarnar í Bandaríkjunum sem verða í næstu viku. Hann sagði við blaðamenn að vopnahlé á Gaza væri bráðnauðsynlegt og sagði stríðið verða að enda.

„Við þurfum vopnahlé. Við þurfum að enda þetta stríð. Það ætti að taka enda, það ætti að taka enda, það ætti að taka enda,“ sagði Biden.

Hann sagðist ætla að fylgja þessu eftir um leið og hann væri búinn að kjósa utan kjörfundar.