Blaðamanni bandaríska miðilsins Associated Press var í gær bannað að koma ásamt öðrum blaðamönnum inn á skrifstofu Bandaríkjaforseta við undirritun forsetatilskipana.

Var þetta vegna þess að miðillinn neitaði að breyta nafni Mexíkóflóa í Ameríkuflóa í umfjöllun sinni, í samræmi við forsetatilskipun Donalds Trump þess efnis, að því er fram kom í yfirlýsingu AP. Þar lýsti AP áhyggjum af því að ríkisstjórn Trumps refsaði miðlinum fyrir óháða blaðamennsku.

Samband fréttaritara Hvíta hússins mótmælti ákvörðuninni og sagði að Hvíta húsið gæti ekki stýrt fréttaflutningi og ætti ekki að refsa blaðamönnum vegna óánægju með ritstjórnarlegar ákvarðanir.