Guðrún Hafsteinsdóttir dómsmálaráðherra segir líða að því að hún taki ákvörðun í máli Helga Magnúsar Gunnarssonar vararíkissaksóknara.

Hann er í leyfi eftir að Sigríður Friðjónsdóttir ríkissaksóknari lagði það til við ráðherra í lok júlí að Helgi Magnús yrði leystur tímabundið frá störfum. Ástæðan var ummæli hans á opinberum vettvangi um hælisleitendur og flóttafólk, sem voru að mati ríkissaksóknara „ósæmileg og ósamrýmanleg starfi hans“. Málið er enn á borði ráðherra og óvíst er hvenær niðurstaða fæst í það.

„Það líður að því,“ sagði Guðrún eftir ríkisstjórnarfund í morgun.

Þýðir það í þessari viku?

„Ég treysti mér ekki alveg til að segja hvaða dag, en það líður að því.“