Skæð fuglaflensa hefur greinst í mávi sem fannst við Reykjavíkurtjörn. Mávurinn var fangaður og síðar aflífaður og Tilraunastöð Háskóla Íslands staðfesti að um smit var að ræða.

Matvælastofnun greindi frá þessu á heimasíðu sinni í dag. Þar segir einnig að almenningur sé beðinn um að tilkynna tafarlaust um fund á veikum eða dauðum villtum fuglum til Matvælastofnunar.

Þetta er fyrsta greining sjúkdómsins í villtum fugli á höfuðborgarsvæðinu á þessu ári, en í síðasta mánuði var greint frá því að fuglaflensan hefði dreift sér þvert á landshluta.

Á heimasíðu MAST eru nánari upplýsingar um hvernig hægt er að tilkynna um dauða eða veika fugla.