Um hundrað jarðskjálftar hafa mælst sunnan við Hveragerði síðasta sólarhringinn. Samkvæmt upplýsingum frá Veðurstofu Íslands voru þetta mjög litlir skjálftar og mældist aðeins handfylli þeirra yfir einn að stærð.

Hrinan hófst í gærmorgun og var þétt síðdegis í gær en virðist nú að mestu vera að detta niður. Að sögn náttúruvársérfræðings eru hrinur sem þessar algengar nærri Hveragerði, ýmist vegna jarðhita eða flekahreyfinga.