„Vil að við gefum meira í og vinnum þá með tíu mörkum“

Íslenska liðið vann fimm marka sigur í fyrri leiknum gegn Austurríki á laugardag. Gísli Þorgeir vill að liðið bæti frekar í, í leiknum í dag, en að missa niður forskot líkt og í fyrri leiknum.

„Bara að drepa þennan leik meira. Við erum komnir sjö mörkum yfir og þeir ná að minnka þetta niður í fjögur mörk og ég vil persónulega að við gefum bara meira í og vinnum þá með tíu mörkum,“ segir Gísli.

Aron Pálmarsson segir mikilvægt að liðið finni taktinn í leiknum í dag. „Það er náttúrulega langt síðan við spiluðum leik saman og það er kannski ástæðan fyrir einhverjum tæknifeilum. Svo eru náttúrulega nýjar áherslur. Þannig að við þurfum bara aðeins að stilla okkur betur saman og svo bara toppa á réttum tíma á EM,“ segir Aron.

Leikur Íslands og Austurríkis er sýndur beint á RÚV kl. 17:00.